Hona hemen Ni, Jainko, zure guraria egin dagidan.
Senideok: Legeak, etortekoak diran ondasunen kerizea bakarrik izanik eta ez gauzen izatea bera, urtero eten barik eskeintzen diran opari berberen bidez, ez daikez ezelan ere bete-beteko egin eskeintza horreek egiten dabezanak. Bestela, amaitu egingo ziran opariak; izan ere, eskeintza horreek egiten dabezanek behin garbitu ezkero, inongo pekatu-kontzientziarik ez eben izango. Baina opari horreetan urtero barritzen da pekatuen oroitzapena, zezenen eta akerren odolak ezin daikez-eta pekatuak desegin.
Horregaitik, Kristok, munduan sartzean, dino:
«Ez zenduan nahi izan opari eta eskeintzarik;
baina gorputza eratu zeunstan.
Erre-oparirik eta pekatuen parkamen-oparirik
ez zenduan atsegin izan.
Orduan, esan neban:
Hemen nozu, Jainko, zure nahia beteteko;
holan dago Nitaz idatzita Liburuan».
Lehenengo dino: «Ez zenduan nahi izan, ez atsegin izan, opari eta eskeintzarik, ez erre-oparirik, ez pekatuen parkamen-oparirik», nahiz eta gauza guztiok legeak agindutakoak izan. Ondoren, beste hau dino: «Hemen nozu, zure nahia beteteko».
Lehenengo kultua kentzen dau, bigarrena jarteko. Eta Jesu Kristok behin betiko egin eban bere gorputzaren opariaren bidez Jainkoaren nahia bete daualako izan gara gu sagaratuak.
R/ Hemen nozu, Jauna, zure nahia egin dagidan.
Opari eta eskeintzarik ez dozu nahi izan,
baina belarriak edegi deustazuz;
erre-opari eta hoben oparirik ez dozu eskatu;
orduan esan dot nik: «Hemen nozu». R/.
Liburuan nitaz hau dago idatzita:
Egin dagidala zure nahia.
Ene Jainko, gogozko jat hori,
eta bihotz-maminean dot zure legea. R/.
Iragarri dot batzar nagusian zure salbamena,
ezpanik ez dot itxi, badakizu, Jauna.
Poztu eta alaitu bediz Zugan
zure bila dabilzanak.
«Gora Jauna» esan begie beti
zure salbamena opa dabenak. R/.