Zintzoa bere leialtasunak biziazoko dau.
Ez al zara Zu, Jauna, betidanik nire Jainko,
nire santua? Zu ez zara hilten!
Jauna, nire harkaitza,
Zeuk ezarri dozuz babiloniarrak
zeure epaia beteteko;
Zeuk emon deutsezu indarra
gu zigortzeko.
Garbiegiak dozuz begiak
gaiztakeriari begira egoteko,
jasanezina dozu zapalketea.
Zelan zagoz, bada, maltzur horreei begira?
Zelan isilik, gaiztoak bera baino zuzenagoa
irensten dauan bitartean?
Itsasoko arrain edo nagusi bako narrasti balira lez
darabilzuz gizakiak.
Zelan amuak arraina,
holan dabe babiloniarrek harrapatzen jentea:
sareetara erakarri eta batzen dabez,
eta jai egiten dabe pozez jauzika.
Sakrifizioak eskeintzen deutsoez sareari
eta intsentsua erreten,
janari gozo eta oparoa emon deutsela-eta.
Eten barik sarea hustutzen,
herriak erruki barik hilten
jarraituko ete dau?
Neure talaian egongo naz,
neure torrean zutunik,
Jaunak zer esaten deustan zain,
nire kexeari zer erantzuten deutsan.
Orduan, Jaunak erantzun eustan:
«Idatzi agertuko deutsudana
ezarri taulatxoetan, erraz irakurteko eran.
Ikuskari hau ez da beteko
epea burutu arte,
baina badoa helbururantz,
ez dau huts egingo;
luzatzen bada, zuk itxaron,
berandu barik helduko da-eta.
Harroak ez dau bakerik bere barruan;
zintzoa, ostera, bere leialtasunari esker biziko da».
R/ Zure bila dabilenik ez dozu, Jauna, izten eskutik.
Jauna, barriz, errege da betiko,
ezarri dau aurkia auzirako:
justiziaz gobernatzen dau mundua,
zuzenbidez epaitzen herriak. R/.
Jauna dau ihesleku zapalduak,
ihesleku larrialdian.
Zugan dabe konfiantzea zure izena autortzen dabenek,
ez dozu-eta, Jauna, eskutik izten zure bila dabilenik. R/.
Egin kantu Jaunari, Sionen errege danari,
iragarri herrien artean haren egintza bikainak.
Hiltzailea zigor barik izten ez dauanak
gogoan ditu dohakabeak,
ez dau ahazten hareen deadarra. R/.
Sinismena bazendue, ez litzateke zuentzat ezinezkorik izango.
A
LDI haretan, gizon bat hurreratu jakon Jesusi eta, belaunikaturik,
esan eutson: «Jauna, erruki zakioz nire semeari; epilepsia emoten
deutson deabrua dau eta gorriak ikusiazoten deutsoz. Sarritan
botatzen dau sutara eta uretara. Ekarri deutset zure ikasleei, baina ezin izan
dabe osatu».
Jesusek esan eutsen: «Hau gizaldi sinisgogor eta makurra! Noiz arte egon
behar ete dot zuekin? Noiz arte jasan behar ete zaituet? Ekarri mutila hona».
Jesusek gogor eraso eutson deabruari eta urten egin eban mutilagandik;
ordu haretatik osatuta gelditu zan.
Ikasleek, Jesusengana hurreraturik, bakarrean itaundu eutsoen: «Eta guk,
zergaitik ezin izan dogu bota deabrua?» Jesusek erantzun eutsen: «Zuen
sinismena txikia dalako. Egia dinotsuet: sinismena bazendue, mostaza-
hazia baizen txikia izanik be, mendiari “aldatu hemendik hara” esan
ezkero, aldatu egingo litzateke; ez litzateke zuentzat ezinezkorik izango».
Jaunak esana.