Zoaz, eta iragarri egiozu profeta-berbea nire herriari.
Egun hareetan, Amatziasek, Betelgo abadeak, barri hau bialdu eutsan Israelgo errege Jeroboami: «Amos azpilanean dabilzu hemen, israeldarren artean; herriak ezin dau gehiago jasan haren esanik. Honan dino-eta Amosek:
"Jeroboam ezpataz hilgo da,
eta Israel herria
erbestera eroango dabe
bere lurraldetik urrun"».
Orduan, Amatziasek esan eutsan Amosi: «Ikusle, zoaz, alde hemendik Judako lurraldera. Egin han profetearena eta irabazi zeure ogia. Baina ez jardun gehiago profetagintzan Betelen, hau errege-santutegia eta erreinuko jauretxea da-eta ».
Amosek erantzun eutsan Amatziasi: «Ni ez naz ogibidez profeta, abeltzaina naz eta basapiku-batzailea Abeltzain nenbilela hartu ninduan Jaunak eta bere herri Israeli profetizatzera bialdu. Orain, bada, entzun Jaunaren berbea. Zuk dinozu ez dagidala iragarri Jaunaren mezua Israelen kontra, ez dagidala berba egin Isaaken ondorengoen kontra. Holan ere, hona zer dinoan Jaunak:
"Zure emaztea emagaldu bihurtuko da urian,
zure seme-alabak ezpatapean hilgo dira;
zure lurraldea banatua izango da;
zu zeu atzerrian, lurralde kutsatuan, hilgo zara,
eta Israel herria
erbestera eroango dabe
bere lurraldetik urrun"».
R/ Jaunaren arauak zuzenak dira, bihotzaren asegarri.
Jaunaren legea bikain, barrua berbizteko,
Jaunak iragarria sendo, ezikasiak eskolatzeko.
Jaunaren arauak zuzen, bihotzaren asegarri,
Jaunaren aginduak garbi, begien argi. R/.
Jaunaren bildurra garbi, iraungarri betiko,
Jaunaren erabagiak egiazko, guztiak guztiz bidezko.
Urrea baino, urre araztua baino maitagarriago,
ezti-orrazia baino gozoago. R/.