Urun-katilua ez zan agortu, Jaunak Eliasen ahoz esan eban lez.
E
GUN hareetan, Elias profeta Kerit erreka ondoan egoan ezkutatuta.
Aldi baten buruan, agortu egin zan errekea, ez eban-eta euririk egin
lurralde haretan. Orduan, honan berba egin eutson Jaunak Eliasi: «Ea, zoaz
Sidongo Sareptara eta gelditu zaitez bertan bizitzen. Zuri jaten emoteko
agindu deutsat hango emakume alargun bati». Sareptara joan zan Elias.
Uriko ateetara heldu zanean, emakume alargun bat ikusi eban zotzak
batzen. Eliasek deitu eta esan eutson: «Ekarri egidazu ontzian ur-apur bat
edateko». Bila joiala, Eliasek atzetik oihu egin eta esan eutson: «Ekarri
egidazu, arren, ogi-zati bat be».
Emakumeak erantzun eutson: «Ala Jauna, zure Jainkoa! Ez dot bape
ogirik; eskutada bat urun besterik ez dot katiluan, eta orio-apur bat
pitxerrean; zotzak batzen nenbilen, neure semearentzat eta biontzat opil
egin, jan eta gero hil gaitezan».
Eliasek esan eutson: «Ez bildurrik izan. Zoaz eta egin esan dozuna; baina
egidazu lehenengo niri sutopiltxu bat eta ekarri egidazu. Gero, egingo
dozu semearentzat eta zeuretzat. Hau dino-eta Jaunak, Israelen Jainkoak:
“Urun-katilua ez da agortuko, ezta orio ontzia amaituko be, Jaunak lurrera
euria bialduko dauan egunera arte”».
Joan zan, bada, emakumea eta egin eban Eliasek esana, eta luzaroan jan
eben Eliasek eta ama-semeek. Urun-katilua ez zan agortu, ezta orio ontzia
amaitu be, Jaunak Eliasen ahoz esan eban lez.
Jaunak esana.
R/ Erakutsi guri, Jauna, zeure aurpegi argitsua!
V/.
Deitzen deutsudanean, erantzun, Jainko, ene defendatzaile.
Estualdian emoidazu nasaitasun.
Erruki zakidaz eta entzun nire otoitza.
Zuek, handikiok,
noiz arte iraindu behar dozue nire ohorea?
Huskeria dozue maite
eta guzurraren atzetik zabiltze. R/.
Zuek zaree munduaren argia.
Aldi haretan, Jesusek esan eutsen ikasleei: «Zuek zaree lurraren gatza. Baina gatza gazatzen bada, zelan gazitu barriro? Ez dau dagoaneko ezertarako balio, kanpora bota eta jenteak zapaltzeko baino.
Zuek zaree munduaren argia. Ezin daiteke ezkutatu mendi gainean dagoan herria. Kriseilua ere ez da iziotzen lakaripean ipinteko, argimutilaren gainean ipinteko baino, etxeko guztiei argi egin deioen.
Era berean, zuen argiak danen aurrean egin behar dau argi, zuen egintza onak ikusiz, zeruko zuen Aita goratu dagien».