Simon eta Judas apostoluak

Apostoluen oinarri gainean eraikiak zagoze.

Senideok: Ez zarie arrotz, ez atzerritar, Jainkoaren herriko kide baino eta Jainkoaren familiako, apostoluen eta profeten oinarri gainean eraikiak, Kristo Jesus bera giltzarri dala. Honengan ondo finkaturik, etxegintza osoa gora doa, tenplu santu bihurtzeraino Jaunagan. Honengan etxegintzaren parte zarie zuek be besteekin batera, Espirituagan Jainkoaren bizileku bihurtzeraino.

R/ Lurbira guztira zabaltzen da hareen hotsa.

V/. Zeruek Jainkoaren aintza dabe kontatzen,

ortziak haren eskuen lana iragartzen.

Egunak egunari luzatzen deutso mezua,

gauak gauari jakinarazoten. R/.

V/. Berbotsik eta hitzik barik,

entzun ezinezkoa da hareen ahotsa.

Lurbira guztira zabaltzen da hareen hotsa,

munduaren bazterreraino hareen hizkera. R/.

Hamabi aukeratu ebazan, eta apostolu izena emon eutsen.

Aldi haretan, Jesus mendira joan zan otoitz egitera, eta Jainkoari otoitzean igaro eban gaua.

Eguna argitu ebanean, ikasleei deitu eta hareetako hamabi aukeratu zituan, eta apostolu izena emon eutsen: Simon –honi Pedro izena ezarri eutson– eta honen anaia Andres, Santiago, Joan, Felipe, Bartolome, Mateo, Tomas, Santiago Alfeorena, Simon –Zelote eritxona–, Judas Santiagorena eta Judas Iskariote, Jesusen saltzaile izan zana.

Jesus ikasleakaz menditik jatsi eta zelaigune baten gelditu zan. Ikasle-multzo handia zan harekin; baita herriko jentetza ugaria be, Judea osotik, Jerusalemdik eta Tiroko eta Sidongo itsasaldetik etorria, hari entzutera eta euren gatxetatik osatzera. Espiritu gaiztoek oinazetuak osatu egiten ziran. Jente guztiak Jesus ikutu gura eban ze, halako indar bat erion, danak osatzen zituana.