Abrahamek sinistu egin eban, ezelako itxaropiderik ez egoanean itxaropenari eutsiz.
SENIDEOK: Euren oinordekotza mundua izango ebela agindu eutsen Jainkoak Abrahami eta ondorengoei. Agintzari hau, ostera, ez egokion legea betetzeari, sinismenak dauan salbazino-indarrari baino. Beraz, agintzaria, dohai hutsa izanik, fedeari dagokio; holan, Abrahamen ondorengo guztientzat balio dau, legearen arabera ondorengo diranentzat ez ezik, baita Abrahamen sinismenaren arabera diranentzat be. Bera aita dogu guztiok, Liburu Santuak dinoan lez: «Herri askoren aita egin zaitut». Abraham aita dogu, beraz, Jainkoaren aurrean, harek sinistu egin eban-eta hildakoak biziarazoten eta izaterik ez dabenak izatera dei egiten deutsen Jainkoagan.
Abrahamek sinistu egin eban, ezelako itxaropiderik ez egoanean itxaropenari eutsiz; holan, herri askoren aita egin zan, Jainkoak esan eutsonaren arabera: «Horrenbeste izango dira zure ondorengoak».
Jaunak esana.
R/ Gogoan dau eten barik Jaunak bere ituna.
Edota: Aleluia.
V/.
Zuek, Jaunaren morroi Abrahamen jatorrikook,
Jakoben seme-alabok, haren aukeratuok,
Jauna da gure Jainkoa,
lur osoaren gain haren aginpidea. R/.
V/.
Gogoan dau eten barik bere ituna,
mila gizalditarako agindua;
Abrahamegaz eginiko ituna,
Isaaki egindako zina. R/.
Espiritu Santuak irakatsiko deutsue, ordu berean, zer esan behar dozuen.
Aldi haretan, Jesusek esan eutsen ikasleei: «Jentearen aurrean autortzen nauana autortuko dau Gizonaren Semeak ere Jainkoaren aingeruen aurrean; baina jentearen aurrean ukatzen nauana ukatu egingo dabe Jainkoaren aingeruen aurrean. Gizonaren Semearen aurka zeredozer esaten dauanari parkatuko deutso Jainkoak; baina, Espiritu Santuaren aurka birao egiten dauanari ez deutso parkatuko.
Sinagogetara, buruzagien eta agintarien aurrera, eroango zaitueenean, ez ibili kezkatan zelan egin edo zer esan zeuen alde, Espiritu Santuak adierazoko deutsue-eta une haretan bertan zer esan behar dozuen».
Liburu honen irakurgai guztiak lezionarioan: Lukas →