Jesu Kristok opariak behin betiko eskeini zituan, bere burua eskeiniz.
Senideok: Jesusek betiko salbau daikez beraren bidez Jainkoagana hurreratzen diranak, bizirik dago-eta beti hareen alde erregutzeko.
Benetan, Jesus lango abade nagusia behar genduan guk: santu, errubarik eta kutsubakoa, pekatariakandik bereizia eta zeruak baino gorago jasoa. Honek ez dau, beste abadeek lez, lehenengo bere pekatuakaitik eta gero herriarenakaitik egunero opariak eskeini beharrik, behin betiko egin eban-eta hori, bere burua opari eskeini ebanean. Legeak, izan ere, gizon ahulak izendatzen ditu abade nagusi; legea baino geroago etorria dan Jainkoaren zin-berbak, ostera, Semea izendatu dau abade nagusi, bete-betea betiko.
Hau da esaten dihardugunaren gailurra: hain handia da gure abade nagusia, ezen Jainko handiaren eskumaldean jesarria dago-eta zeruetan, eta bere abade-zerbitzua Jainkoak egindako santutegian beteten dau, eta ez gizakiek egindako itun-etxolan.
Edozein abade nagusi emoitzak eta opariak eskeintzeko jarria dagoanez, Jesusek ere zeredozer eskeini behar eban. Lur honetan balego, Jesus ez litzateke abade ere izango, hor dagoz-eta Legearen arabera opariak eskeintzen dabezan abadeak. Honeen zerbitzua, ostera, zeruko gauzen irudi eta kerizpe besterik ez da, Jainkoak Moisesi, etxola egitekoan, adierazo eutsanaren arabera: «Izan arreta esan eutsan Jaunak dana mendian erakutsi jatzun ereduaren arabera egiteko».
Baina, orain, Jesusek kultu-zerbitzu bikainagoa sortu dau, itun hobearen, agintzari hobeetan oinarrituta dagoan itunaren bitarteko dan ezkero.
R/ Iragarri Jaunaren heriotza, Bera etorri artean.
Zuk ez dozu sakrifizio eta eskeintzarik gura izan,
ez erre-opari eta pekatuen parkamen-oparirik eskatu;
baina belarriak edegi deustazuz.
Horregaitik dinot: «Hemen nozu». R/.
Hau dago nitaz liburuan idatzita:
egin dagidala zure nahia.
Atsegin dot, ene Jainko:
barru-muinetan daukot zure legea. R/.
Iragarri dot batzar nagusian zure justizia,
ez ditut ezpanak itxi, ondo dakizu, Jauna.
Poztu eta alaitu bediz Zugaz
zure bila dabilzanak;
«Handia da Jauna» esan begie beti
zure salbamena maite dabenek. R/.