Jainko ahalguztidunak emoten deutso nekatuari adorea.
Hau dino Jainko santuak:
*Zeinen antzeko egingo nozue?
Nor Ni lakorik?+
Jaso gora begiak eta ikusi:
Nork egin ditu guzti horreek?
Banaka-banaka ataraten ditu zeruko astroak
eta bakotxari bere izenaz deitzen deutso;
hain da-eta ahaltsu, biziro indartsu,
batek ere ez deutso haren deiari huts egiten.
Zergaitik zabilz, Jakoben herri, esaka;
zergaitik, Israel, marmarka:
*Jaunak ez ditu nire bideak ezagutzen,
nire Jainkoa ez da nire auziaz arduratzen!+
Ez al dakizu? Ez al dozu entzun?
Jauna da betiko Jainkoa, lur osoaren Egilea.
Ez da nekatzen, ez akitzen;
ulermenaz gaindikoa da haren adimena.
Harek emoten deutso nekatuari adorea
eta ezinduari indarra.
Nekatu eta akitu egiten dira gazteak,
ahuldu eta jausi mutilak;
Jaunagan itxaroten dabenak, barriz,
indarbarritu egiten dira:
hegoak hazten jakez arranoei lez,
lasterka egin eta ez dira nekatzen,
ibili eta ez dira akitzen.
R/ Ene arima, goratu egizu Jauna.
Bedeinkatu begi nire arimak Jauna,
nire barru osoak haren izen santua.
Bedeinkatu begi nire arimak Jauna,
ez bediz ahaztu haren mesedeak. R/.
Erru guztiak deutsuz parkatzen,
gaitz guztiak osatzen;
zure bizia hilobitik askatzen dau,
maitasunez eta errukiz koroatzen zaitu. R/.
Bihozbera eta errukiorra da Jauna,
haserregaitza eta ondoguraz betea.
Ez gaitu erabilten gure pekatuek merezi lez,
ez deusku ordaintzen geure erruen arabera. R/.
Zatoze Nigana nekatuok.
Aldi haretan, Jesusek esan eban: *Zatoze Nigana nekatu eta zamapetu guztiok, eta Nik arinduko zaituet. Hartu egizue nire buztarria eta ikasi Nigandik, gozoa eta bihotz-apala nazalako, eta aurkituko dozue zeuen arimentzako atsedena. Nire buztarria leuna dalako, eta nire zama arina+.