Hamabi oinarrietan, Bildotsaren hamabi apostoluen izenak.
Aingeruak esan eustan niri, Joani: Zatoz, andragaia erakutsiko deutsut, Bildotsaren emaztea.
Hartu ninduan aingeruak eta mendi handi eta garai batera eroan ninduan espirituz; Jerusalem uri santua erakutsi eustan, zerutik Jainkoagandik jaisten, Jainkoaren aintzaz dizdiratsu. Haren dizdira harribitxi eder baten antzekoa zan, jaspe harria baizen gardena.
Harresi sendo eta garaia eban, hamabi atekoa, eta ate gainetan hamabi aingeru eta hamabi izen idatziak, israeldarren hamabi leinuen izenak. Hiru ate sortaldera egozan, hiru iparraldera, hiru hegoaldera eta hiru sartaldera. Uriko harresiak hamabi oinarri zituan, eta honeetan idatziak Bildotsaren hamabi apostoluen izenak.
R/ Ezagutuazo begie zure zintzoek, Jauna, zure erregetzaren bikaintasuna.
Goratu zagiezala, Jauna, zeure sorkari guztiek,
Bedeinkatu zeure fededunek;
Aitatu begie zure erregetza ospetsua,
Mintzatu bediz zure ahalmenaz. R/.
Gizakiei agertuz zure egite ahaltsuak,
zure erregetza ospetsuaren bikaintasuna.
Zure erregetza betiko erregetza,
mendez mendekoa zure nagusitza. R/.
Zintzoa da Jauna bere bide guztietan,
leiala egintza guztietan.
Bertan dago Jauna dei egiten deutsoenengandik,
benetan dei egiten deutsoen guztiengandik. R/.
Hona hemen egiazko israeldarra, azpikeria bakoa.
Aldi haretan, Felipek Natanael aurkitu eban, eta esan eutsan: «Moisesek legearen liburuan eta Profetek euren idazkietan aitatu ebena aurkitu dogu: Jesus, Joseren semea, Nazaretekoa». Natanaelek esan eutsan: «Nazaretetik urten ete daike ezer onik?» Felipek erantzun: «Zatoz eta ikusi».
Jesusek Natanael Beragana etorten ikusi eta esan eban: «Hona hemen egiazko israeldarra, faltsukeria bakoa». Natanaelek esan eutsan: «Nondik ezagutzen nozu?» Jesusek erantzun: «Felipek zuri dei egin baino lehen, pikupean zineala, ikusi zindudazan». Natanaelek erantzun eutsan: «Maisu, Zu Jainkoaren Semea zara; Zu Israelgo Erregea zara». Jesusek erantzun: Pikupean ikusi zindudazala esan deutsudalako, sinesten al dozu? Handiagorik ere ikusiko dozu». Eta esan eutsan, gainera: «Bene benetan dinotsuet: Zerua zabalik ikusiko dozue eta Jainkoaren aingeruak gora eta behera Gizonaren Semearen gainean».