Ezpan zikineko gizona izanik, nire begiek Erregea, diran guztien Jauna, ikusi dabe.
Ozias erregea hil zan urtean, Jauna ikusi neban, tronu altu eta garai batean jesarrita; haren mantu-hegalak tenplua beteten eban. Suzkoak lako izaki batzuk ebazan gainean; seina hegal ebezan: bi hegalez aurpegia estaltzen eben, beste biz gorputza, eta beste biz hegaz egiten eben. Eta honan egiten eutsoen oihu alkarri:
«Santu, santu, santua, Jaun ahalguztiduna!
Lur osoa beteten dau haren aintzak!»
Ahotsaren oihuz tenpluko ate-orpoek dar-dar egin eben, eta tenplua kez bete zan. Nik esan neban:
«Ai ene, galdua naz!
Ezpan kutsatuak ditut-eta
eta ezpan kutsatuak dituan herrian bizi naz.
Errege eta Jaun ahalguztiduna ikusi dot neure begiz!»
Une haretan, suzkoak lako izaki hareetako bat etorri jatan hegaz, altaratik suhatzez harturtako txingarra eskuetan ekarrela, eta txingarragaz ahoa ikutu eustan, esanez:
«Hara, txingar honek ezpanak ikutu deutsuz;
kendu jatzu, bada, gaiztakeria,
parkatu pekatua».
Orduan, Jaunaren ahotsa entzun neban esaten: «Nor bialduko dot? Nor izango dogu mandatari?» Eta nik erantzun: «Prest nozu, bialdu neu».
R/ Errege da Jauna, jantzi da handikiro.
Errege da Jauna, jantzi da handikiro;
jantzi da Jauna, indarra dau gerriko. R/.
Lurbira Berak jarri dau sendo,
eta ez da kolokatuko.
Sendo dago betidanik zure aurkia,
Zu betidanik zara. R/.
Zure autormenak oso sinesgarri dira:
zure etxeari santutasuna dagokio, Jauna,
gizaldien gizaldietan. R/.
Zuek, gauza guztiak itzita, Neugana etorri zareenok, ehun halako jasoko dozue
Aldi haretan, Pedrok esan eutsan Jesusi: Hara, guk dana itzi dogu, Zuri jarraitzeko. Zer izango da guretzat?
Jesusek erantzun eutsen: Benetan dinotsuet: Jainkoak mundu hau erabarritzean, Gizonaren Semea bere aintzazko tronuan jesartean, zuek ere, nire jarraitzaileok, hamabi tronutan jesarriko zaree, Israelgo hamabi leinuak epaitzeko. Eta Nigaitik etxea, senideak, aita, ama, seme-alabak eta lurrak izten dituanak, ehun halako hartuko dau eta betiko bizia jasoko ondare lez.