Nire emaztetzat hartuko zaitut betiko.
Honan dino Jaunak:
«Nik neuk liluratuko dot,
basamortura eroan
eta bihotzera berba egingo deutsat.
Han bere gaztaroan lez erantzungo deust,
Egiptotik igon ebanean lez.
Egun haretan dino Jaunak,
"ene Senar" deituko deustazu,
eta ez "ene Baal".
Neure emazte egingo zaitut betiko;
neure emazte egingo justiziaz eta zuzenbidez,
maitasunez eta errukiz.
Leialtasunez egingo zaitut neure emazte,
eta zuk ezagutuko dozu Jauna».
R/ Samurra da Jauna eta errukiorra.
Egunero zaitut bedeinkatuko,
zure izena goratuko beti.
Handia da Jauna, guztiz goragarria,
haren handitasuna muga bakoa. R/.
Belaunaldi batek besteari zure egintzak deutsaz goraipatzen,
zure egite ahaltsuak iragarten.
Zure aintza eta ospe disdiratsua agertuazoten dabe,
eta nik zure egintza harrigarriak adierazoten. R/.
Zure balentria izugarriak aitatzen dabez,
eta nik zure egintza handiak kontatzen.
Zure ontasun handiaren barri dabe emoten
eta zure salbamena poz-oihuz goratzen. R/.
Errukiorra eta bihozbera da Jauna,
haserregaitza eta ondogurz betea.
Ona da Jauna guztientzat,
gupidaz betea bere sorkari guztientzat. R/.
Alabea hil jat oraintxe. Zatoz, ostera, eta biziko da.
Aldi haretan, Jesusek berbetan ziharduala, buruzagietako bat etorri jakon eta, ahuspezturik, esan eutsan: «Hil barria dot alabea; baina zatoz hari eskua ezartera, eta biziko da». Jesus jagi eta atzetik joan jakon bere ikasleekin.
Honetan, hamabi urte hareetan odol-jarioz egoan emakume bat atzetik hurreratu jakon Jesusi eta soineko-ertza ikutu eutsan, honan inoan-eta berekautan: «Jantzia behinik behin ikutzen badeutsat, osatuko naz».
Bihurtu zan Jesus eta, emakumea ikustean, esan eutsan: «Izan bihotz, alaba! Zeure sinesmenak osatu zaitu». Eta ordu beretik osatuta gelditu zan.
Heldu zan Jesus buruzagiaren etxera eta, hango erostariak eta jentearen zaratea ikustean, esan eutsen: «Alde hemendik! Neskatilea ez dago hilda, lo dago». Hareek barre egiten eutsoen.
Jesusek, jentea bialdu ebenean, sartu eta eskutik heldu eutsan neskatileari, eta neskatilea jagi egin zan. Inguru guzti haretan zabaldu zan jazotakoaren barri.