Jesusen odolak pekatu guztitik garbitzen gaitu.
Senide maiteok:
Hona hemen Jesu Kristogandik entzun dogun mezua
eta zuei iragarten deutsueguna:
Jainkoa argia da
eta Haregan ez da ezelako ilunik.
Haregaz alkartasunean bizi gareala esan
eta ilunpetan baldin bagabilz,
guzurra dinogu
eta ez dogu egiaren eraz egiten.
Baina argitan bagabilz,
alkartasuna dogu batak besteagaz
eta haren Seme Jesusen odolak
pekatu guztitik garbitzen gaitu.
Pekaturik ez dogula esaten badogu,
geure burua engainatzen dogu
eta egia ez dago gugan.
Geure pekatuak autortzen badoguz, ostera,
leiala eta zuzena dan Jainkoak
parkatuko deuskuz pekatuak
eta gaiztakeria guztitik garbituko gaitu.
Pekaturik ez dogula egin esaten badogu,
guzurti egiten dogu Bera,
eta haren mezua ez dago gugan.
Ene seme-alabok, pekaturik egin ez dagizuen
idazten deutsuet hau.
Halan ere, norbaitek pekatu egiten badau,
badogu laguntzailea Aitaren aurrean,
zuzena dan Jesu Kristo.
Harek bere burua eskeini eban
gure pekatuen parkamenerako;
eta ez gureen parkamenerako bakarrik,
baita mundu guztikoen parkamenerako ere.
R/ Bedeinkatu begi nire arimak Jauna!
V/.
Bedeinkatu begi nire arimak Jauna,
nire barru osoak haren izen santua.
Bedeinkatu begi nire arimak Jauna,
ez bedi ahaztu haren mesedeaz. R/.
V/.
Erru guztiak deutsuz parkatzen,
gatx guztiak osatzen;
zure bizia hilobitik askatzen dau,
maitasunez eta errukiz koroatzen zaitu. R/.
V/.
Bihozbera eta errukiorra da Jauna,
hasarregatxa eta onginahiz betea.
Ez dihardu eten barik auzitan,
ez dau hasarrea betiko gordetzen. R/.
V/.
Zelan aita seme-alabentzat errukior,
halan Jauna begirune deutsoenentzat bihozbera;
ondo daki-eta zerez garan eginak,
gogoan dau hautsa garala gu. R/.
V/.
Jaunaren maitasuna, barriz, betidanik betidaino
begirune deutsoenentzat,
haren salbazino-asmoak belaunez belaun dirau
haren ituna gordetzen dabenentzat. R/.
Bihozbera naz eta apala.
Aldi haretan, Jesusek esan eban: «Bedeinkatua Zu, Aita, zeru-lurren Jauna, gauza honeek jakintsuei eta burutsuei gorde eta jente apalari agertu deutsazuz-eta. Bai, Aita, holan izan dozu gogoko. Nire Aitak dana emon deust, eta ez dau inork Semea ezagutzen, Aitak baino; ezta Aita ere, Semeak baino eta Semeak agertu nahi deutsanak baino.
Zatoze Nigana nekatu eta zamapetu guztiok, eta Neuk arinduko zaituet. Hartu egizue nire buztarria eta ikasi Nigandik, gozoa eta bihotz-apala nazalako, eta aurkituko dozue zeuen arimentzako atsedena. Nire buztarria leuna eta nire zamea arina da-eta».