Sinesmenaren bidez menperatu ebezan erreinuak. Jainkoak guretzat zeredozer hoberik erabagita eukan.
Senideok: Zertan jarraitu berba egiten? Ez neuke asti nahikorik izango, Gedeon, Barak, Samson, Jefte, David, Samuel eta Profetez berbetan hasiko banintz.
Sinesmenari esker erreinuak menperatu ebezan, justizia egin, Jainkoak agindutakoa eskuratu, lehoien ahoak itxi, su gartsuak amatau, ezpataz hilak izateari ihes egin, gaixotasunetatik osatu, guduan bulartsu jokatu eta atzerritarren gudari-taldeei atzera eragin.
Emakume batzuek berbizturik berreskuratu ebezan euren hildakoak. Beste batzuk, barriz, torturapean hil ziran, handik libratzeari uko eginez, bizitza hobera biztuteko itxaropenagaitik; beste batzuek irainak eta zigorkadak, kateak eta espetxeak eroan ebezan; harrikatu egin ebezan, zerraz ebagi, ezpataz hil; hara eta hona ibili ziran, ardi- eta ahuntz -narruz estaldurik, premina gorrian, erasopean eta tratu txarrak hartuz. Munduak merezi baino hobeak ziran eta noraezean ibili ziran basamortuetan, mendietan eta lurreko leize eta kobazuloetan.
Baina honeek, euren sinesmenagaitik Jainkoak onetsi ebazan arren, ez eben eskuratu Jainkoak agindutakoa; izan ere, Jainkoak zeredozer hobea prestau eban guretzat, eta ez eban nahi izan hareek helmugara gu barik heltzerik.
R/ Bizkortu zaiteze, izan bihotz, Jaunagan uste on dozuen guztiok.
Bai handi, Jauna, zure ontasuna
bildur deutsuenei gorde deutsezuna;
Zugana batzen diranei
gizakien aurrean agertzen deutsezuna. R/.
Zure aurpegiaren kerizpean babesten dozuz
gizakien asmo maltzurretik;
zure txabolan gordeten dozuz
mihin gaiztotik.
Bedeinkatua Jauna, harrigarrizko maitasuna
uri sendoan agertu deustana. R/.
Nik ostera, esan neban neure ikaran:
«Erauzia nozu zeure aurretik.»
Baina, Zuk, deika niharduala,
entzun zenduan nire otoitz-oihua. R/.
Maitatu egizue Jauna, Haren zintzo guztiek:
Jaunak zaintzen ditu leial diranak;
baina, ordain gogorra emoten deutse
harro dabilzanei. R/.