Izar bat sortuko da Jakobenetik.
Egun hareetan, Balaamek, begiak jasorik, Israel ikusi eban leinuka oihal-txaboletan. Orduan, Jainkoaren espiritua etorri jakon eta olerki hau abestu eban:
*Hona hemen Beorren seme Balaamen,
begi argiko gizonaren, mezua;
hona hemen, estasian, begiak zabal-zabal,
Jainkoaren berbea entzuten
eta Ahaltsuaren agerpena ikusten dauanaren mezua.
Bai ederrak zure txabolak, Jakoben herri,
bai ederrak zure bizilekuak, Israel!
Ibar zabalak dirudie, ibai ondoko baratzak,
Jaunak landatutako zumintzak, ur-ertzeko izeiak.
Ura gainezka dabe pitxarretan,
ondo bustitako lurretan hazia.
Israelgo erregea Agag erregea baino handiagoa da,
haren erregetza gero eta garaiago+.
Beste olerki hau ere abestu eban:
*Hona hemen Beorren seme Balaamen,
begi argiko gizonaren, mezua;
hona hemen, estasian, begiak zabal-zabal,
Jainkoaren berbea entzuten dauanaren mezua,
Goi-goikoaren egitasmoa ezagutzen
eta Ahaltsuaren agerpena ikusten dauanaren mezua.
Ikusten dot,
baina ez da orain jazoko;
begiztatzen dot, baina ez da berehala beteko:
Izar bat sortzen da Jakoben herritik,
aginte-makileak urteten dau Israeldik;
birrinduko dau Moaben bekokia
eta Seten ondorengoen burua+.
R/ Erakutsi niri, Jauna, zeure bideak.
V/.
Azaldu niri, Jauna, zeure bideak,
erakutsi zeure bidezidorrak.
Gidatu nagizu zeure leialtasunean, eta irakatsi,
Zeu zara-eta nire Jainko salbatzailea. R/.
V/.
Izan gogoan, Jauna, zeure errukia eta maitasuna,
betidanikoak dira-eta.
Gogoratu nitaz zeure maitasunean,
zeure ontasunari dagokionez, Jauna. R/.
V/.
Ona eta zuzena da Jauna,
bidea erakusten deutse pekatariei.
Apalak zuzenbidez daroaz,
bere bidea erakusten deutse apalei. R/.
V/. Erakutsi guri, Jauna, zeure maitasuna, emon zeure salbazinoa. R/.
Joanen bateoa nondik etorren?
Aldi haretan, Jesusek tenplura etorri eta irakasten ziharduala, abadeburuak eta herriko zaharrak hurreratu jakozan, itaunka: *Zein aginpidez egiten dozu hori? Nork emon deutsu aginpide hori?+
Jesusek erantzun eutsen: *Nik ere gauza bat itaunduko deutsuet; erantzuten badeustazue, Nik ere esango deutsuet zein aginpidez egiten dodan hori. Joanek noren aginduz bateatzen eban: Jainkoaren aginduz ala gizakien aginduz?+
Hareek euren barruan inoen: *Jainkoaren aginduz ziharduala esaten badogu, zergaitik sinestu ez geuntson esango deusku. Eta gizakien aginduz ziharduala esaten badeutsagu, barriz, jentearen bildur gara, guztiek profetatzat dabe-eta Joan+.
Beraz, hau erantzun eutsoen Jesusi: *Ez dakigu+. Jesusek, orduan, esan eutsen: *Nik ere ez deutsuet, bada, esango zein aginpidez egiten dodazan gauza honeek+.