Pazko-aldiko VII. Asteko Larunbata

Erroman gelditu zan, Jainkoaren erreinua iragarten.

Erroman sartu ginanean, Paulori bere etxean bizitzeko baimena emon eutsoen, gudari bat zaintzaile ebala.

Handik hiru egunera, Paulok juduen buruzagiei dei egin eta, batu ziranean, honan berba egin eutsen: «Anaiok, ni, herriaren aurka edo geure asaben usadioen aurka ezertxo ere egin barik, preso egin eta erromatarren eskuetan itzi ninduen Jerusalemen. Hareek, itaunketa egin ondoren, askatu egin gura izan ninduen, ez eusten-eta heriotzea merezidu ebanik ezer aurkitu.

Baina juduek aurka urten ebelako, enperadoreagana jo behar izan neban; neure herria ezertan salatzeko asmo barik, ostera. Horregaitik ikusi nahi izan zaituet eta zuekin berba egin; izan ere, Israelen itxaropenagaitik naukee lotuta kate honeek».

Paulo urte bi bizi izan zan han bere kontura, eta ikustera etorkozan guztiak hartzen ebazan etxean. Jainkoaren erreinua iragarten eban eta Jesu Kristo Jaunari jagokona irakasten ausardiz, ezelango eragozpen barik.

R/ Zure aurpegia zintzoek ikusiko dabe, Jauna.

edo Aleluia.

Jauna bere etxe santuan; Jaunak zeruak jarleku:

begiak argi ditu, gizakiak betazalez ikertzen ditu.

Jaunak ikertzen zintzoa eta gaiztoa,

Haren bihotzak indarkeriazaleentzat gorrotoa. R/.

Gaiztoen gainera txingarrak, infernu-harria euri,

sargori-haizea izango dabe edontziko edari.

Zuzena da-eta Jauna, zuzentasuna dau maite,

Haren aurpegia zintzoek ikusiko dabe. R/.

Ikasle honek idatzi ditu jazoera honeek, eta honen autormena egiazkoa da.

Aldi haretan, Pedrok bihurtu eta Jesusek maite eban ikaslea ondoren etorrela ikusi eban —afaltzekoan, Jesusen bular gainean jarririk, «Jauna, nor da salduko zaituana?» itaundu eutsana—. Ha ikusi ebanean, bada, Pedrok itaundu eutsan Jesusi: «Jauna, eta hori zer?» Jesusek erantzun eutsan: «Ni bihurtu arte hori gelditzea gura baldin badot, zuri zer? Zuk jarraitu Niri».

Berba honeek zirala-eta, ikasle ha hilgo ez zalako zurrumurrua sortu zan senideen artean. Jesusek, ostera, ez eutsan esan ez zala hilgo, beste hau baino: «Ni bihurtu arte hori gelditzea gura baldin badot, zuri zer?»

Ikasle haxe da gauza guzti honei buruz testigantzea egiten dauana eta idatzi dituana, eta badakigu egiazkoa dala haren testigantzea.

Beste gauza asko ere egin zituan Jesusek. Guztiak banan-banan batuko balira, nik uste, mundu osoan ere ez litzatekezala sartuko idatzi leitekezan liburuak.

Egindako guztia ikusi eban Jainkoak, eta oso ona zan.

Hasieran Jainkoak zeru-lurrak egin zituan. [Lurra nahas-mahas hutsa zan: leize handiaren gainean ilunpea. Eta Jainkoaren arnasea uren gainean ebilen.

Eta Jainkoak esan eban: «Izan bedi argia». Eta izan zan argia. Ikusi eban Jainkoak argia ona zala eta bereizi egin eban ilunpetik. Argiari «egun» ezarri eutsan izena, eta ilunpeari «gau». Eta arrats eta goiz: lehenengo eguna.

Jainkoak esan eban: «Izan bedi sabaia uren artean, goiko eta beheko urak bereiztu dagizan». Eta halan izan zan. Jainkoak sabaia egin eban eta sabai azpiko urak sabai gaineko uretatik bereiztu ebazan. Sabaiari «zeru» ezarri eutsan izena. Eta arrats eta goiz: bigarren eguna.

Jainkoak esan eban: «Batu bediz zeru azpiko urak leku bakar batean eta agertu bedi lehorra». Eta halan izan zan. Lehorrari «lur» ezarri eutsan izena, eta ur-multzoari «itsaso». Eta Jainkoak ona zala ikusi eban.

Jainkoak esan eban: «Emon begi lurrak landaretza: hazidun landareak eta zuhaitzak, bakoitzak jagokon frutua, hazi eta guzti, ekarriko dabenak». Eta halan izan zan. Lurrak emon eban landaretza: hazidun landareak, bakoitza jagokon haziagaz, eta frutua ekarriko daben zuhaitzak, bakoitza jagokon haziagaz. Eta Jainkoak ona zala ikusi eban. Eta arrats eta goiz: hirugarren eguna.

Jainkoak esan eban: «Izan bediz argizagiak zeru-sabaian, eguna eta gaua bereizteko, eta jaiak, egunak eta urteak adierazoteko; disdiratu begie zeru-sabaian, lurrari argi egiteko». Eta halan izan zan. Argizagi handi bi egin zituan Jainkoak: handiena egunaren gain jarteko, eta txikiena gauaren gain, eta izarrak ere egin zituan. Eta Jainkoak zeru-sabaian ipini ebazan, lurrari argi egiteko, egunaren eta gauaren gain jarteko eta argia eta ilunpea bereizteko. Eta Jainkoak ona zala ikusi eban. Eta arrats eta goiz: laugarren eguna.

Jainkoak esan eban: «Egin begie urek borbor bizidunez, eta egin begie hegan hegaztiek lurraren gainean, airean». Eta Jainkoak arraintzarrak egin zituan eta uretan borbor dabiltzan mota guztietako bizidunak eta mota guztietako hegaztiak. Eta Jainkoak ona zala ikusi eban. Eta bedeinkatu egin zituan, esanez: «Sortu egizuez umeak, ugaritu eta bete itsasoko urak; ugaritu bediz hegaztiak ere lurraren gainean». Eta arrats eta goiz: bosgarren eguna.

Jainkoak esan eban: «Sortu begiz lurrak mota guztietako bizidunak: abereak, narrastiak eta piztiak». Eta halan izan zan. Jainkoak mota guztietako piztiak, abereak eta narrastiak egin ebazan. Eta Jainkoak ona zala ikusi eban.]

Eta Jainkoak esan eban: «Egin dagigun gizakia geure antzera, geure irudiko; menperatu dagizala itsasoko arrainak, zeruko hegaztiak, etxeko abereak eta lurreko narrastiak».

Jainkoak, beraz, bere irudiko egin eban gizakia, Jainkoaren beraren irudiko egin eban; gizaseme eta emakume egin zituan. Eta bedeinkatu egin ebazan Jainkoak eta esan eutsen: «Sortu egizuez umeak eta ugaritu, bete lurra eta izan beraren nagusi; menperatu egizuez itsasoko arrainak, zeruko hegaztiak eta lurrean dabiltzan piztia guztiak».

Jainkoak esan eban: «Begiratu, zuei emoten deutsuedaz lurraren azalean diran hazidun landare guztiak eta hazidun frutua dakarreen zuhaitz guztiak; janari izango dozuez horreek. Abere, zeruko hegazti eta lurrean dabiltzan bizidun guztiei, barriz, bedar hezea emoten deutset janari». Eta halan izan zan. Eta egindako guztia ikusi eban Jainkoak, eta oso ona zan. [Eta arrats eta goiz: seigarren eguna.

Honan, burutuak gelditu ziran zeru-lurrak eta honeetan dagoan guztia. Zazpigarren egunerako burutu eban Jainkoak egindako lana, eta zazpigarren egunean, egindako lan guztiaren ondoren, atseden hartu eban.]

R/ Bai dohatsu Jaunagan itxaropide dauan gizakia.

Bai dohatsu gaiztoen asmoari jarraitzen ez deutsana,

hobendunen bidean ez dabilena,

lotsabakoen batzarrean jezarten ez dana.

Bestetara, Jaunaren legean atsegin dauana,

gau eta egun Haren legea hausnartzen dauana. R/.

Ur ertzean aldaturiko zuhaitza lakoa izango da,

bere sasoian emoten dau frutua,

eta orririk ihartzen ez jako,

zeregin guztietan ondo doakio. R/.

Ez holan gaiztoak, ez holan:

haizeak daroan lastoa lakoak izango dira.

Zintzoen bidezain Jauna dago-eta;

gaiztoen bidea, barriz, hondamendirako. R/.

Neu naz egiazko mahatsondoa, eta nire Aita da nekazaria.

ALDI haretan, Jesusek esan eutsen ikasleei: «Neu naz egiazko mahatsondoa, eta nire Aita da nekazaria. Nigan fruturik emoten ez dauan aihena ebagi egiten dau Aitak, eta frutu emoten dauana garbitu eta kimatu, frutu gehiago emon dagian. Zuek, honezkero, garbi zagoze, Nik adierazo deutsuedan hitzari esker. Iraun egizue Nigan, Nik zuengan bezala. Aihenak berez, mahatsondoan ez badago, fruturik emon ezin dauan lez, zuek be ez, Nigan irauten ez badozue.

Neu naz mahatsondoa eta zuek aihenak. Norbait Nigan badago, Ni harengan bezala, harek frutu asko emongo dau; ze, Ni barik ezin dozue ezer egin. Nigan ez dagoana kanpora botatzen dabe, ebagi eta igartzen dan aihenaren moduan; gero, batu, surtara bota eta erre egiten dabe.

Nigan bazagoze eta nire berbak zuengan badagoz, eskatu gura dozuena eta izango dozue.

Jaunak esana.